Mission Inventari

Despuish 2012, eth Despartament deras Hautas-Pireneas que dispausa de un cargat de mission Inventari. Eth inventari generau deths monuments e deths riquèrs artistics de França qu'ei estat creat en 1964 pera volontat d'André Malraux, alavetz Ministre dera Cultura. En 2004, pendent eras leis de descentralizacion, aquera competéncia qu'ei estada balhada aras Regions.

Entà dispausar d'agents deth Inventari sus eth ensemble deth sué territòri, era Region Occitània qu'a signat convencions d'associacion dab collectivitats. Qu'ei eth cas dab eth Despartament deras Hautas-Pireneas.

Era mission Inventari qu'a permetut despuish 10 ans d'estudiar subjèctes plan divèrs en mantun endret deth territòri : abadia dera Escaladieu, comunas de Sent Sever e Sent Pèr, patrimòni barròc de l'aglomeracion Tarba-Lorda-Pireneas… Mantuas publicacions que son estadas publicadas : glèisa de Sarrancolin, Sent Sever, Jardins de Tarba, Barròca, etc.

Eras dadas arreculhidas en archius e sus eth terren que son eth objècte d'enregistrament ara basa regionau e aras basas nacionaus arregropadas laguens era platafòrma aubrita deth patrimòni (basa POP), accessibla a tots en linha. Aqueras dadas que permeten tanben era realizacion d'utís de mediacions : conferéncias, visitas comentadas, liberets e guidas de visita, etc.

Eth cargat de mission Inventari que pòt tanben vier en aida deras comunas de qui at vòlen valorizar eth lor Patrimòni. Laguens eths Archius despartamentaus, que segueish chantièrs deth Despartament e que participa ath estudi e ara conservacion deths documents iconografics e objèctes.