Era situacion deths archius despartamentaus

Dinc ara, eth servici deths Archius despartamentaus deras Hautas-Pireneas que dispausava de un site principau e de dus annèx entà assegurar eras suas missions.

Eras Ursulinas coma site principau...

Inaugurat en 1937 carrèra deras Ursulinas a Tarba, eth site principau qu'arregropa ua grana part deras activitats deth servici. Que s'i arrecensa eths burèus deths agents, eths espacis d'arcuelh deth public, espacis de tribalh especifics (sala de condicionament, talhèr d'arreligaduras e restauracion), magasins, lòcs d'estocatge deths archius de ua capacitat leugerament superiora a 9 km linearis.

E mes dera saturacion deths magasins, eths espacis de tribalh ne son pas mes adaptats aras necèras de un servici d'archius : que notam l'abséncia de sala de tria e de classament o encòra era manca de utís utils entara valorizacion (sala d’exposicion, espaci dedicat ath servici educatiu entà arcuélher eth public escolar…).

Arretrobatz era presentacion d'aqueth bastiment gràcia ara mòstra «Un octogénaire : le bâtiment des Archives départementales».

...E eths dus annèx

Era saturacion deth espaci d'estocatge deth site deras Ursulinas qu'entrainè eth arrecors a un prumèr site annèx, aqueth der'anciana Escòla normau situada carrèra Eugène Ténot, proprietat deth Despartament.

E mes deth arcuelh deths archius, aqueth bastiment a arcuelhut era sala de tria e de classament, atau coma eth espaci de numerizacion deths archius dinc ar'aviada dera campanha de desemprovatge deths documents de qui i son conservats. Aquestes que s'an a i estar transferits avant eth començament deth chantièr d'amainatjament deth bastiment navèth deths archius despartamentaus. En efèit, qu'ei aqueth site qu'ei estat arretiet peth Conselh despartamentau entà arcuélher eth edifici navèth.

Aqueth site arribant a saturacion coma aqueth deras Ursulinas, un annèx segond qu'ei estat amainatjat ar'anciana sala deras ventas Saint-Jean de Bordèras. S'aqueth bèth cobèrt e presenta eth avantage de hornir un espaci d'estocatge important, n'arrespon pas completament aras nòrmas de conservacion. Nat espaci de tribalh (sala de classament notament) n'i ei pas disponible.

Se aqueras dus annèx an permetut aths Archius despartamentaus de tostemps assegurar ua deras suas missions màger : era collècta – uei que s'i arrecensa mes de 19 km lineari d'archius – totun que presenten fòrça dificultats de qui impactan eras autas missions : condicions de conservacion pòc satisfasentas, aluenhament deths sites complexifiant daubuas prètzhèits sus eth plan organizacionau, nat espaci de tria, de classament e de valorizacion, nada sala de desemprovatge e de quarantea...

Cap ad aquera situacion, eth Conseilh despartamentau que decidè donc, en octobre de 2018, de dotar eth servici deths archius de un utís totaument adaptat aras necèras sus eth site der'anciana Escòla normau de Tarba.