Eth projècte : un pòle culturau et patrimoniau en còr de vila
Nomat laureat deth concors e titulari deth marcat de mestreja d'òbra, eth cabinet IDOM Consulting Engineering Architecture qu'arrespon dab eth sué projècte a totas eras necèras de un servici d'Archius atau coma aqueth deths Archius despartamentaus deras Hautas-Pireneas en tornar hèr víver un edifici situat en plen còr de Tarba.
Per ua part, qu’ei sauvat eth bastiment dera Escòla normau, vestigi arquitecturau deth sègle XIXau de Tarba. Dab ua volontat clara e afichada de limitar eth mes possible era demolicion de çò de qui existeish. Eth còr centrau qu'ei donc mantengut, eras duas alas capavant e caparrèr tanben. Sonque eths pabalhons auxiliaris que seràn desmolits. Aqueth ensemble en fòrma de "U" qu'a eth avantatge, de mes, de formalizar er'accès a de capvath (rue Eugène Ténot) per un parvís-jardin. Dinc ara embarrat, aqueth espaci arborat, que s'afirmarà coma un senhau d'entrada deth bastiment en èster aubrit cap ara vila.
Entre eth embaish e eths dus estatges der’edifici que son arrepartits eths espacis aubrits ath public (hall d’arcuelh, sala de lectura, sala d’exposicion, auditorium, sala pedagogica) atau coma eths espacis administratius (burèus, sala de reunions…). Aquera organizacion interna que pòrta ara lutz er'importéncia e eth ròtle jogats peths espacis de valorizacion amainatjats ath embaish : eth arcueilh e eth espaci pedagogic que son plaçats ath còr centrau, eth espaci d’expausicion laguens era ala de capavant e era sala de conferencia laguens era ala de caparrèr. Aquera disposicion que da aths Archius un estatut d’espaci culturau de mediacion e de vita ath bèth mei deth quartièr.
Aute lòc aubrit ath public, era sala de consultation deths Archius, lòc de calma, qu'ei amainatjada au darrèr estatge, devath era carpenta de husta de qui hè vàler eth patrimòni architecturau eritat.
En arrepréner era fòrma deth bastiment existant, eth mestre d'òbra que propausa, d'auta part, ua extension de qui entorneja eth bastit ancian peth exterior e de qui segueish eth dessenh en U deth ancian entà formar un escrin de qui valoriza eth patrimòni. Dab aqueth apròchi, era volumetria d'aqueras construccions navèras qu'ei optimizada entà limitar era hautor e eth impact visuau.
Ath mei d'aqueth ensemble, que seràn agençadas eras partidas arreservadas ath servici e necessàrias ara bona conduita deras missions : espaci de recepcion deths versaments, magasins d’archius de ua capacitat de 23 km linearis, espacis ligats ara conservacion (talhèr d'arreligadura-restauracion, salas de desemprovatge e de quarantea, locau d'estocatge deth materiau de conservacion…) e ara numerizacion (talhèr d'arreproduccion numerica), salas de tria e de classament…
Aquera extension que propausarà ua segond davant principau a de capsús (carrèra Georges Magnoac) de qui permeterà ua dobla entrada publica : aquesta que darà ua permeabilitat navèra ath bastiment, un eish traversèr dera parcèla en hargar ua porositat urbana.
Eths dus bastiments que seràn arreligats per un pati de qui apareish coma un espaci d’aledada entre eths dus ensembles, un putz de lutz e un espaci d'encontre entre eth ancian e eth navèth.
En plen còr de Tarba, eth bastiment deths Archius despartamentaus que's confirmarà un lòc culturau e patrimoniau ideau de qui participarà ar'animacion deth quartièr, en assumir un movament de personas limitat de qui ne disturba pas era calma de qui profitan eth monde deth quartièr.
Aqueth projècte arquitecturau qu'arrepresenta definitavement ua ocasion de tornar ara Escòla normau, edifici de qui apartié ath patrimòni locau, era sua visibilitat, eth sué caractari simbolic, e l'erigir en un bastiment iconic der'identitat deths Tarbés e deths Hauts-pirenencs.